640_Autism

Síðastliðin ár virðast fleiri og fleiri börn greinast með einhverfu. Af þessum orsökum hafa foreldrar, heilbrigðisstarfsfólk, vísindamenn og margir fleiri leitað að ástæðunni fyrir þessari aukningu. Skýringanna er oftast leitað í matarræði eða öðrum umhverfisþáttum og sem dæmi hafa margir tengt saman bólusetningar og einhverfu.

En nýlega hafa tvær rannsóknir verið birtar, önnur unnin í Svíþjóð og hin í Danmörku sem báðar benda til þess að einhverfutilfellum sé ekki raunverulega að fjölga.

Rannsóknirnar voru svipað uppbyggðar, þýðið sem þær náðu yfir voru börn fædd á árunum 1993-2002 (í Svíðþjóð) og einnig börn fædd á árunum 1980-1991 (í Danmörku). Upplýsingum var safnað um börnin og hegðun þeirra í gegnum foreldrana. Þegar foreldrarnir voru spurðir útí hegðun sem í dag er tengd við einhverfu kom í ljós að slík hegðun var til staðar hjá sama hlutfalli barna og greinast með einhverfu í dag. Sem sagt, einhverf börn voru hlutfallslega jafnmörg fyrir 10-30 árum síðan og þau eru í dag, þrátt fyrir það sem oft hefur verið kallað einhverfufaraldurinn sem við okkur blasir í nútímasamfélagi.

Skýringin á þessu er líklegast einfaldlega sú að staðlarnir sem börn þurfa að uppfylla til að teljast einhverf eru betur skilgreindir og auðveldari í greiningu en þeir voru fyrir 30 árum. Nýjar aðferðir og uppgötvanir leiða þannig til þess að fleiri börn fá skilgreiningu á sínum vanda en áður. Þetta gæti einnig þýtt að börn sem eru á einhverfurófi án þess að það hafi mikil áhrif á daglegt líf þeirra eru að fá greiningu sem þau þurfa mögulega ekki á að halda.

Skilaboð höfunda til vísindasamfélagsins eru fyrst og fremst þau að í stað þess að eyða fjármunum og mannafla í að skilgreina hvers vegna holskefla einhverfugreininga gengur yfir, ættum við að beyta orkunni í að skilja einhverfu betur og styðja við bakið á þeim börnum sem þurfa á stuðningi að halda vegna einhverfu sinnar.

Hér má lesa umfjöllun fréttasíðunnar Forbes um rannsóknirnar en einnig er hægt að nálgast umfjöllun The Daily Beast hér.