Mynd: Wa Eye Care
Mynd: Wa Eye Care

Fyrir stuttu síðan birti Hvatinn frétt um rannsóknir sem tengdu saman útivist og minni líkur á nærsýni. Í fréttinni eru vísað í nokkrar rannsóknir sem framkvæmdar voru í Sydney í Ástralíu og einnig i Ohio í Bandaríkjunum. Í báðum þessum rannsóknum kom fram fylgni milli þess að stunda mikla útiveru og minnkuðum líkum á nærsýni. Nú hefur enn ein rannsóknin bæst í hópinn sem gefur svipaðar niðurstöður og slær því enn frekar á gagnrýnisraddir.

Rannsóknin sem um ræðir birtist í JAMA í september og var framkvæmd við Sun Yat-sen University í Kína. Í rannókninni er 40 mínútna útiveru bætt inní skóladag rúmlega 900 barna. Á sama hátt eru rúmlega 900 börn úr öðrum skólum skoðuð til viðmiðunar. Á þremur árum lækkaði nærsýni barnanna í skólunum þar sem útivera var aukin niður í 30,4%, samanborið við 39,5% nærsýnistilfella í viðmiðunarskólum.

Þessi marktæki munur gefur kenningum vísindamanna í Sydney og Ohio byr undir báða vængi. Aukin útivera í skólum, í þeim tilgangi að minnka líkur á nærsýni kemur sér að öllum líkindum vel fyrir alla krakka, aukin útivera er nefnilega ekki bara góð fyrir augun heldur líka sálina.