Mynd: Foodproduction
Mynd: Foodproduction

Við könnumst öll við matarfilmuna, þunna plastið sem við notum til að vernda matinn okkar. Þessi filma getur komið sér ansi vel þegar við viljum auka geymsluþol afganganna, en filman hentar ágætlega til þess þar sem hún hindrar aðkomu súrefnis að matnum. Mörgum er þó illa við að vefja miklu magni af plasti utan um matvælin auk þess sem matarfilman dugar bara svo og svo lengi. Það má því segja að markaðurinn hafi ágætispláss fyrir hina nýju lífrænu matarfilmu sem vísindahópur við National University of Singapore stefna nú á að þróa.

Filman sem um ræðir er ekki gerð úr plasti heldur er uppistaðan í henni kítósan. Kítósan er lífræn fjölliða, þ.e.a.s sykra sem hefur margar greinar, sem einangruð er úr skeljum sjávardýra á borð við rækju. Vegna byggingar kítósans er auðvelt að láta efnið mynda nógu þétt net til að mynda filmu, sambærilega við matarfilmuna. Vegna þess að kítósan er lífrænt þá hefur það ekki neikvæð áhrif á matvælin okkar eins og plast gæti gert í langtíma geymslu og að auki hefur filman mjög áhugaverða og jákvæðar aukaverkanir sem felst í bakteríudrepandi virkni sinni.

Fáar bakteríur eða sveppir geta brotið niður kítósan en í flestum tilfellum hefur fjölliðan hamlandi áhrif á örverurnar sem lengir geymsluþol matvælanna. Til að bæta svo við jákvæðu fréttirnar þá brotnar filman auðveldlega niður eftir notkun, öfugt við plastið.

Enn sem komið er hefur hópurinn í Singapore ekki birt ritrýndar greinar um rannsóknir sínar en í fréttatilkynningu sem lesa má á heimasíðu háskólans kemur fram að unnið hafi verið að verkefninu síðastliðin þrjú ár og að fyrstu rannsóknir lofi góðu.